خَلْ نْكونْ صَريحين


رعد دكالي
رعد دكالي

اليوم نبتعد عن الرسميات والفصحى وخلونا نسولف شوي
أكو مثل شعبي عراقي يكول أكْعدْ أَعوج وأْحجي عَدل واليوم نحجي العدل ومَراح نزعلْ أحد ولا نضَوجه لان ما نكوله هسه هو  الحقيقة يعني ما جبنا شي من جيبنا ولو الحقيقة مرات تكون مُره….
خْل نرجع شوي لورا(الى الوراء)يعني فد عشرين او ثلاثين سنة  مو هواية حسب ما اتذكر اني والماضي الكلش بعيد نتركه للي يتذكره,المهم بذيج الفترة( بالثمانينات والتسعينات)جانت بغداد مليانه بارات وملاهي ومحلات مال شرب,ومو بس بغداد اي مكان بالعراق جانت موجوده,بس نأخذ بغداد كمثل لانها العاصمة الحبيبة,مَجان اكو منطقه مابيها بار او مخزن لبيع المشروب,,,,صح لولا عمي,,,,ومعْظَم هاي البارات والمطاعم من الدرجة الاولى والملاهي ومحلات البيع جانت ألنا(اقصد للمسيحيين)أخاف واحد يكول منو انتم؟؟
زين منو جان يكعد بهاي البارات ويسكر للصبح!!!!!
منو جان يروح للملهى ويرجع الغبشه لبيته!!!!!!!!
منو جان يمشي بالشوارع ويطوطح!!!!!!!!!!!
منو جان يتخبل على  ربع بعشيقه أبيض!!!!!!
أكيد 95% من اللي جانوا يكعدون بهاي الاماكن  مو مسيحيين؟لان تدرون كلش زين المسيحيين اكثر شي يشربون ببيوتهم لو بأنديتهم الاجتماعية,,اني وياك جان اكو من يروح للبار او الملهى بس قصدي الاكثرية هم مو مسيحيين اذا منو جانو؟؟هم نفسهم اللي يكولون اليوم الشرب حرام!!!!!!!!!
تدرون جان يكولون علينا حرام تشربون بالبيت؟لعد وين نشرب يابا؟؟بالبار او الملهى!!!!!يعني بالبيت حرام وبالبار مو حرام!!والله عجيبه؟
لو ناخذ منطقه بغداد الجديدة(لانني عشت بيها سنين طويله واعرفها شبر شبر )تعرفون جم بار جان اكو بيها؟جم مخزن يبيع مشروب؟اكثر من عشر بارات وتشوفوها كلها مليانه من الظهر للتعزيلة؟طيب منو هم ذوله اللي جانو كاعدين هناك؟؟اني اكول,كلهم من اخواننا…..لو تلكا واحد لو ثنين من عدنا(لاتزعلون رجاءا كلنا من البداية الحقيقة احيانا تكون مره وقاسية)والله اللي جان يكعد ويسكر هو الطبيب والمحامي والعقيد واللواء وووو يعني ناس من جميع الطبقات تروح وتسكر عادي,,بالمناسبة اكو دكتور صديقي بغداد الجديدة ينزل من عيادته الى البار كبل لان البار قريب هو بنفس عمارة عيادته جان يكول لوما هذا البار واحد وين يروح بالليل!!!!رحمهالله والديك يادكتورنا..
سالفه صغيره حتى ما أطولها عليكم؟؟
بيوم من الايام طلعت متاخر(تدرون كبل الدنيا امان شوَكت ما تريد تطلع عادي)المهم طلعت من نادي بابل اللي بالكرادة (تحياتي وحبي للنادي ومن باقي هناك) وجنت شارب قوطيتين بيرة وأجرت تكسي للبيت,أول ما كْعَدت,كلي السائق انت سكران؟كتله لا مو سكران بس آني شارب,,وكال شنو الفرق؟كتله اكو فرق لو آني سكران جان هسه اطوطح وما اتفلسَف براسك صح لو لا؟كال والله والنعم لعد احنا ليش نسكر(اشو راسا طلع الربعية وكام يجر صادا بدون مي),كتله تفضل انت دتشرب بالسياره شنو لذتها؟كال ابويا ما يقبل اشرب بالبيت يكول حرام روح اشرب بره؟شوفو بالبيت حرام وبره مو حرام؟شوفو العقلية؟؟المهم رباط الحجي مالتي يا اخوان اريد اكول اللي قام بحرق محلات بيع المشروب بزاخو وسميل وغيرها هم نفسهم باكوا صناديق البيره وشربوها؟؟؟
واليوم نسوا كل ذيج السنين وكاموا يحجون بالحرام؟؟ياحرام يمعود؟؟؟
الحرام هو ان تقتل وتخطف وتعذب وتزني وتغش وووو؟هذا هو الحرام؟الحرام ان تأذي جيرانك وصديقك واخوك اللي عايش وياك سنين طويلة؟الحرام ان تقطع ارزاق الناس؟الحرام هو ان تسوي شي يغضب رب العالمين لان هو وحده سبحانه وتعالى يجازي البشر مو يجي واحد ويحاسب بكيفه؟كلنا بشر خلقنا الله وهو وحده الكفيل بينا……
واخيرا اقول؟؟
ماذا تريدون من المسيحيين؟ماهو هدفكم من ازعاجهم وقتلهم وتهجيرهم وخطفهم؟
كانوا في بغداد والبصره وكركوك وغيرها من المدن تركوها والتجاوا الى مناطق آمنه وهناك لم يسلموا من اياديكم ؟ماذا تريدون منهم؟هل لانهم اناس مسالمون ويخافون الله ولايحملون السلاح ولا يقتلون ولا يغشون ولا ولا(وهذا ليس ضعف بل قوة الايمان التي تجري في عروقهم.قوة المسيح التى كرز بها المحبة والسلام) ,أم لانهم يطبقون وصايا الله العشرة,لاتقتل لا تسرق لا تزني لا تكذب ولا ولا ولا؟؟انتم اجيبوا بانفسكم وفكروا في اعمالكم التي تفعلونها بغيركم من البشر.
والله ينور عقولكم ويهديكم الى الطريق الصحيح

رعد دكالي هولندا

عن الكاتب

عدد المقالات : 71

نادي بابل الكلداني في النرويج

الصعود لأعلى