فتاوي للجاجيك / بقلم جلال جرمكا

فتاوى للجاجيك !!
فتاوى.. حول جاجيك بالنعناع والثوم !!
جلال چرمَگا

في زمننا الحالي نرى ونسمع ونقرأ عجب العجاب. منها كثرة الفضائيات وهذه المنافسة غير الشريفة فيما بينهم .. ونلاحظ ظاهرة أهم هي كثرة القنوات الدينية وكثرة الندوات مع رجال دين .. وهذه لاتحسب على ألأمور السلبية إطلاقا فيما إذا كانت من أجل الدين الحقيقي وأظهار الوجه الناصع للدين ألأسلامي ونهجه وتعليماته كالتسامح وألأخوة والمحبة وألأخلاص.. الخ
الذي نلاحظه هو كثرة الفتاوي.. نعم لقد أصبحت مسألة الفتوى لكل من هب ودب ومن كثرة تلك الندوات والمناقشات تراهم يخرجون من المخطط له ويدخلون متاهات لاتنتهي إلا وقد أسائوا أسائة محترمة للأسلام والمسلمون وألأمثلة بالعشرات !!.
والملفت للنظر إن لهذه القنوات وألأستماع الى هذه الندوات لها جمهور واسع في العالم وهم يتابعون ويستفسرون ويتصلون حتى هنالك من ينظر لمدة طويلة حتى ينال مراده ويتصل ويسأل سؤاله من جناب الشيخ … وينال ما أراد أن يناله.. يا للفرحة .
حول مسألة الفتاوي والفتوى.. حدثني أخي العزيز ومهجة القلب / حمدان البغدادي وروى لي هذه الحكاية الحقيقية والتي لاتقبل النقاش مطلقا !!!. .. :

ـ حمدان النوبة مع أهل الفتاوي.. عمي أتركهم هذه أصبحت مسألة يححقون منها ( بعضهم ) مكاسب مالية أو الشهرة.. وإلا معقولة إمرأة في دولة عربية ( أم أنس) تصدر عشرات الفتاوى في اليوم الواحد؟؟ وألأغرب أن مريديها حينما يذكرون أسمها يقولون .. رضي الله عنها!!؟؟.
+ أني ياهو مالتي.. أني أقص عليك ما سمعته من ( أم …) وهي جارتنا.. صدقني شىء أغرب من الخيال!!.
ـ نورنا.. ليش ساكت؟؟.
+ خوش.. هذه المسكينة متدينة وتخاف الله .. زوجها بالليل يضرب بيك( عرق) والمشكلة أنه يطلب منها أن تهيأ له مائدة وصحون من المزات …
ـ وبعدين؟؟.
+ فعلت حسب ألأصول.. بس بعد ما تكررت العملية أرادت أن تعرف رأي الشرع بالموضوع .. لذلك راحت الى جامع المنطقة وشرحت القضية للملا المسئول عن الجامع .. فجرى بينهم التالي :
• مولانا.. دخيلك وضعي سىء.. زوجي يجبرني أن أهيأ له مزات ويبدأ بالشرب وأني مرة متدينة وأخاف الله.. عالجني .. وين أنطي وجهي؟؟!!!.
# زوجك ماذا يشرب من منكرات .. ؟؟؟.
• مولانا.. هو .. يشرب ؟؟؟ هذه .. شيسموها ؟؟ … يشرب… عرق ؟؟.
# أي نوع؟؟ زحلاوي؟؟ مستكي؟؟ أبو الكلبجة ؟؟؟.
• مولانا.. أني شمعرفني.. هذه اللي يخلون بيها ماي تصير مثل الشنينة.. لونها أبيض!!!.
# كلها ( يك حساب) .. يعني ماعرفتي النوعية؟؟… مابيها شىء.. المهم في ألأمر.. لاتعصين أمر زوجك.. حرام في حرام في حرام..والمسألة مابيها تعقيدات.. يعني إذا كان مستكي سويلة جاجيك بالثوم.. لكون المستكة تقتل ريحة الثوم .. وإذا كان زحلاوي.. لاء خلي ويه الجاجيك شوية نعناع.. علمود الريحة !!!… أما عرق الفل( أبو الكلبجة) مايفيد ويا لا نعناع ولاثوم.. خليلة قوزلقورط !!!.
• على بختك مولانا.. أني ردتك عون؟؟ لو فرعون؟؟… وجنابك شمعرفك بالأسماء.. هذه كلها منكرات !!.
# بنتي شطولتيها ؟؟ .. أني أعرف كلشي وكلاشي.. نسمع.. نختلط .. لعد شلون؟؟؟.. ثم هو شرايد منكِ؟؟ شوية لبن وخيار.. لو كم ورقة خس!! شطولتيها وعرضتيها.. لاتعصين أمر زوجك وأنتى… يعني تريدن تهدمين بيتكِ.. تقبلين يتزوج عليكِ؟؟؟.
• هااااااااه ؟؟؟ .. لا مولانا دخيلك.. كلشي ولا الزواج.. لا.. راح أسمع كلامك وأروح ..
# وين رايحة .. ؟؟.
• أشتري نعناع وثوم .. لكون ماكو وقت حتى أسويلة ماعون أمشكل .. أني طايحة الحظ اللي ما عرفت أتصرف.. هم زين خلف الله عليك مولانا والله كان سواها وتزوج علي!!.. لاء مولانا.. أبختك أودعناكم.. .. مع السلامة مولانا ……….
أروح أسوي الجاجيك !!!… والله لأسويلة جاجيك يخبل.. بعد ليش أخاف.. سدي أمين وحصلت على فتوى خمس نجوم.. صدك لو كَالوا.. أخذ الشور من راس الثور.. أستغفر الله .. هاي شبيه فوك ما أشكره النوب كَمت أذمة.. أستغفر الله .. ما يهم بوجهي الى ( فطيمة أم اللبن) اليوم شفت عندها لبن عبالك كَيمر.. الف عافية .. راح أتفنن بالجاجيك.. مو بس هاي راح أسويله ماعونين حمص بطحينة و بابا غنوج .. واجبي لعد وين يروح المسكين؟؟!!.
ـ حمدان بروح أبوك هذه صدك.. وبعدين؟؟.
+ عليش تحلفني ؟.. ولا أبلين.. تمثلت للأمر الواقع .. راح تعلم نسوان الطرف أحدث الطرق لعمل الجاجيك.. وألأقبال عليها منقطع النظير… ديالله.. لو مو فتوى ألأخ لصارت مشاكل ومشاكل..
ـ حمدااااااااان.. محد يعرفك بكَدي.. ماتكعد راحة..
+ يستحيل.. أمام كل حالة عوجة لازم أعلق وأتابع…
ـ عمي والله حقك.. لاتقصر.. وأستمر..
+ بالخدمة آغااااااااااااااااااااااااااااااااتي!!.

———————
تابعوا موقع / مجالس حمدان الثقافية لتروا الكثير / http://hammdann.com/

 

You may also like...

Leave a Reply

Your email address will not be published. Required fields are marked *