بعد سلسلة مقالات مشتركة مع أخي وعزيزي / حمدان البغدادي ، الذي أصبح قاسم مشترك معي وبات يشاركني حتى في بريدي ألألكتروني والسبب كما يبرره / حمدان أنه لايزال يكتب بقلم حبر وعلى الورق.. لا يريد أن يكتب بالكومبيوتر ، إذاً في هذه الحالة ماذا يفعل بالعنوان ألألكتروني ؟؟ ويقول أيضاً وبأصرار :
+ أحلى شىء أن تكتب بالقلم.. نصف قرن وأنا أكتب بالقلم.. لايمكن أن أكتب بالكومبيوتر!!.
حاولت مرارا معه ولكن دون جدوى !!!.
ــ يامعود يا / حمدان .. كلنا مثلك.. عقود ونكتب بالقلم.. ولكن للضرورة أحكام.. الدنيا تتطور ومع التطور الكتابة والبريد والرسائل !!!.
ولكن مع من ؟؟؟ لايتنازل عن رأيه .. لذلك لم أضغط عليه أطلاقاً .. فـ / حمدان ـ دقة قديمة ـ على حد قول ألأخوة المصريون.. حتى ملابسه تقليدية ولايزال بسدارته البغدادية ونفس أسلوب أيام زمان حيث الطيبة والتسامح والصدق .. يا محلى أيام زمان !!!.
بين فترة وأخرى تصلنا رسائل.. منها مدح وشكر.. ومنها أنتقاد .. حتى شتائم .. هكذا هي الدنيا والناس.. لايمكن أن ترضي الجميع !!.
حول هذه المسألة سألته :
ــ شدكَول حمدان ؟؟؟.
+ شوف .. هو شوكت كان طريق الحق والصدق مفروش بالورود ؟؟؟ أكو قول لسيدنا / ألأمام على ـ كرم الله وجهه الكريم ـ يقول : لاتستوحشوا طريق الحق لقلة سالكيه .
ــ حمدان هذه فلسفة .
+ بالتأكيد.. لذلك والله أشكر كل من ينتقدني وحتى الذين يشتموني .. صدقني أظل وياك نكتب الى مالانهاية.. شوكت ما شعرنا أهلنا وناسنا بخير نودع الكتابة لأهلها !!!.
ــ حمدان أكو الك بريد .
+ وينه البريد..؟؟ منهو أرسلها؟؟ شكو بيها ؟؟؟... أنطينياها.. وين ضامها ؟؟
ــ يامصخم .. بريد الكتروني.. بعدك على زمان كَبل.. ضرف ومكتوب ؟؟ شوف .. في الحقيقة ما كاتب أسمه.. بس أبيات من الشعر .. هاك بس بالله أقرأها بصوت عالي خلي نسمعها كلنا .
+ مو على عيني... أسمع :
يا العراق .. وين صفينة ..؟؟

صفينه ايدنه وي الكَاع حتى الكَاع ملّت من خطاوينه.. ـ
وصفينه ركام يامهيوب اسمك .. ليش تريد تمسح كل اسامينه..ـ
وصفينه ايد تلوي الايد بعد ماحار الوكت شلون يلوينه..ـ
وصفينه الدم للركاب يسيل بكل بيت الجفن حضرناه اخاف الموت يلفينه..ـ
وصفينه من الغروب انّام بعد ماجانت سهر كلها ليالينه..ـ
وصفينه نكَول للي يموت روح اخّلص من قهرنا ومن بلاوينه..ـ
وصفينه بالتفكَ متحزمين بس نكتل بعض والموت حادينه..ـ
وصارت كل مدنّا كَبور ظلمه ونلبس بس سواد شوكت ماجيت تلكَينه..ـ
وصفينه عالهويه نذبح الجيران ولا چن سنين الحلوه وياه كَضينّه..ـ
وطولنا اللحايا وكَصرنا الثياب وصار بأسم الدين تطلع كل فتاوينه..ـ
وصفينه نخبط الصافي بنهرنا الماصفه فد يوم طينه..ـ
وصفينه نعيد بالتاريخ ولعصر الجاهليه اليوم ردينه..ـ
ولاجنّه اول حضاره صارت اعل الكَاع ولا چن اول مسلّه احنه سنّينّه..ـ
ولاچن حكمنا الدنيا من بغداد ولا چن المنايا تخاف لو سمعت بطارينه..ـ
ولاچن كَبل واحدنه من ينضام يفز الكَلب من حشاه ويعينه....ـ
.شجــــــــانه اليوم بس كاتل ومكتول ولا رحمه بكَلبنا - كَلي شبينه؟؟..ـ
نبوكَ من الليالي مسامر الخلان ونكَطع وصل حبهم من شرايينه..ـ
نحرّم كل ترافه تخطر اعل البال وندندن صرنا بالبسكوت اغانينه..ـ
وصفينه كلـشي ماحاوين لاحاضر جديد ولاماضي قديم اللي يواسينه..ـ
نهاجر نكَول بلكي يهدّه البال برّه وتتحقق امانينه..ـ
ومن نفرح غفُل نبچي بدمع مهضوم لان فرحتنا تغّص بكل مآسينه..ـ
جاوبني يالعراق وكَلي ليش هيجي صفينه؟؟؟ـ
ـــــــــــــــــــــــــــ
ــ حمدان..؟؟ شنهو رأيك ؟؟؟؟.
+ والله ولا تعليق ... يعني شتريدني أكَول ؟؟؟ .. رحمة الله على والدين اللي كتبها وأرسلها.. هذا عراقي أصيل وعلى راسي ...
ــ أيوالله ياحمدان .. وين صفينا ..؟؟؟... دتشوف بعينك حتى الطيور والحيوانات ألأليفة ما خلصانة من ألأعتداءات والتفجيرات... النه الله .