قصة مثل ( شريف روما )


هبة شهارا
هبة شهارا

من منا لم يسمع المثل المشهور (( شريف روما )) أتوقع أن أغلبيتنا يتوقع أن المثل عن شخصية من روما ذاع صيتها وإستغل منصبه وأخرتها طلع نصاب.. لكن تفاجأت أن المثل أصله بغدادي وصدر بالثلاثينيات !! وبعيدآ عن كل هذا

القصه عجيبه وسأنقلها لكم كما قرأتها وباللهجه العراقية

قصة شريف روما
في الثلاثينيات من القرن الماضي ما كان ببغداد مسارح او حركة مسرحية مثل اللي بمصر , وكان من اكبر رواد المسرح المصري آنذاك الفنان جورج ابيض .. اللي قرر ان يجيب فرقته ويجي لبغداد حتى يعرض مسرحيته الناجحة جدآ في وقتها ( يوليوس قيصر ) طبعآ من أجه جاب وياه بس الممثلين الأساسيين وما جاب الكومبارس حتى يوفر نفقات السفر والتكاليف الأقامة ,, وبما انه ماكو مسارح ببغداد , اختار اكبر قهوة بمنطقة الميدان وسواها مسرح .. بقت مشكلة منين يجيب كومبارس عراقيين .. محد يقبل يقوم بالدور .. جماعة نصحوه انه منطقة الميدان وهي مشهورة عند البغداديين , كانت تعج بحثالة المجتمع من السكيرين (مدمني الخمور) والنشالة والحرامية والمطيرجية والشاذين وجميع فئات اللي عدهم مكسرات , وهذولة ماعدهم عيب ولا شي .. انطيه خمس فلوس يقوم لك بأي دور مسرحي .. وفعلآ جابهم ولبسهم دشاديش الرومان البيضا وخلى على روسهم اطواق الياس على اساس اطواق الغار .. ودربهم

يوم العرض المسرحي مشت الامور على مايرام والكهوة اللي سووها مسرح كانت مليانة بالجمهور .. الى ان وصلت للمشهد اللي بيه ينادي حاجب الملك بأعلى صوته : والآن يتقدم أشراف روما للسلام على جلالة القيصر

 

الجمهور كاعد حباب يتفرج على المسرحية الى ان ظهر الأشراف .. وبدأ الهرج والضحك والعفاط وكل ما يخطر على البال
– لك هذا منو ؟ هذا عبود النشال … ههههههه
– لأ لأ .. دشوف هذا ؟ رزوقي ابن شكرية الـ …….
– هلللللو يااااب .. وهذا…. علوان الـ…. لك انزل , صايرلي شريف روما ؟ ههههههه
ومن هذه الحادثة تولد المثل المشهور
 
 
 

 فلا جانا المثل من روما ولا هم يحزنون

 

منقول

عن الكاتب

عدد المقالات : 138

اكتب تعليق

نادي بابل الكلداني في النرويج

الصعود لأعلى